پێنج شەممە, 08 تشرینی یەکەم 2020 18:06

ئەڵمانیا بە پارەدانی زیادە هاریكاری دەكات، بۆ پاڵپشتیكردنی هەزاران خێزانی ئاوارە كە لە بەردەم مەترسیدان، لە عێراق گرنگ

عێراق- كۆمسیۆنی باڵای نەتەوە یەكگرتووەكان بۆكاروباری پەنابەران (UNHCR)، ئاژانسی پەنابەرانی نەتەوە یەكگرتووەكان لە عێراق، پێشوازی لەو هاریكارییە زیادە خۆبەخشانەیە دەکات کە بڕی 13.36 ملیۆن یۆرۆیە، لە لایەن حکومەتی کۆماری ئەڵمانیای فیدراڵەوە، بۆ دابینکردنی هاوكاری مرۆیی زۆر پێویست و پاراستنی ئەو خێزانە پەنابەرە سورییانەی لە بەردەم مەترسیدان، لە عێراق. ئەم پارەدانەی دوایی، کۆی هاریكارییەكانی ئەڵمانیای بۆ دانیشتوانی ئاوارە لە عێراقدا، دەگەیەنێت بە 21.4 ملیۆن یۆرۆ بۆ ساڵی 2020.

تەشەنەكردنی نەخۆشیی جیهانیی، هاوتا لەگەڵ قەیرانی ئابووریدا، بەشێوەیەکی بەرچاو تەنگەژە داراییەكانی لەسەر زیاتر لە 243 هەزار پەنابەری سووری زیاد کردووە، کە ئێستاكە لە عێراقدا دەژین. بەهۆی ڕێوشوێنەکانی ڕێگری لە کۆڤید-19 (COVID-19)، زۆرێک لە پەنابەران -چ بە فەرمی یان بە شێوەی وەرزی یان ڕۆژانە دامەزرابوون- شاهیدی خراپبوونی بژێوی ژیانیان بوون، ئەمەیش وای كردووە كە بەبێ هاوکارییە مرۆییەكان نەتوانن پێداویستییە سەرەتاییەکانی خێزانەکانیان دابین بکەن.

ئەم هاریكارییە دڵفراوانانەیەی ئەڵمانیا، یارمەتی كۆمسیۆنی باڵای نەتەوە یەكگرتووەكان بۆكاروباری پەنابەران (UNHCR) دەدات بۆ دڵنیابوون لە بەردەوامی بەرنامەکانی پاراستنی ژیان و یارمەتیدان، لەوانە دابینکردنی خزمەتگوزارییە سەرەتاییەکان بۆ ئەو خێزانە پەنابەرانەی كە لەبەردەم مەترسیدان، لە سەرتاسەری عێراقدا. ئەم خزمەتگوزاریانە دەستێوەردانەکانی پاراستنی زۆر پێویست لەخۆ دەگرێت، لەوانە یارمەتیی یاسایی، خزمەتگوزارییەكانی پاراستنی منداڵ، ڕێگریکردن و بەرپەرچدانەوەی توندوتیژی لەسەر بنەمای ڕەگەز و پاراستن لەسەر بنەمای کۆمەڵگە.

هەروەها كۆمسیۆنی باڵای نەتەوە یەكگرتووەكان بۆكاروباری پەنابەران (UNHCR) لە ڕێگەی هەماهەنگییەکی نزیک لەگەڵ بەڕێوەبەرایەتییەکانی تەندروستی لە هەرێمی کوردستانی عێراق و پاڵپشتی كردنیانەوە، لە بنکەكانی چاودێریی سەرەتایی تەندروستی کە لە کامپدا دامەزراون، دەستگەیشتن بە خزمەتگوزارییەكانی چاودێریی سەرەتایی تەندروستی بە خۆڕایی بۆ ئاوارەکان دابین دەكات. وێڕای ئەوەیش، كۆمسیۆنی باڵای نەتەوە یەكگرتووەكان بۆكاروباری پەنابەران (UNHCR) بەردەوامە لە یارمەتیدانی پەنابەران بۆ جێبەجێکردنی پێویستیيە بنەڕەتیيەکانیان، لە ڕێگەی دەستێوەردانە جۆراوجۆرەکانی نەختینە، لەوانە پاڵپشتیی وەرزی، یاریدەدەری نەختینەی فرە مەبەست و یاریدەدەری نەختینەی کۆڤید-19 (COVID-19).

دکتۆر ئۆلیێ دیێل، باڵیۆزی ئەڵمانیا لە عێراق، ڕایگەیاند:"ئێمە چاو لە هاریكارییەكی متمانەپێکراو و سەرکەوتوو لەگەڵ كۆمسیۆنی باڵای نەتەوە یەكگرتووەكان بۆكاروباری پەنابەران (UNHCR) دەکەین، کە گرنگترین هاوبەشی مرۆڤدۆستانەمانە لە عێراق، بۆ ماوەی چەند ساڵێکە." هەروەها، وتی:"پشتیوانیمان لە چالاکییەکانی كۆمسیۆنی باڵای نەتەوە یەكگرتووەكان بۆكاروباری پەنابەران (UNHCR) ، بە شێوەیەکی بەرچاو هاوکار بووە بۆ باشترکردنی دۆخی ژیانی پەنابەران، ئاوارە ناوخۆییەکان، گەڕێنراوە زیانلێكەوتووەكان و هەروەها کۆمەڵگا خانەخوێکانیان لە عێراق. ئامانجی ئێمە وەك خۆی دەمێنێتەوە، کە دەتوانن سوود لەو پاراستن و پشتیوانییە مرۆڤدۆستانانە وەربگرن کە پێویستیانە. لەم کاتە سەختانەدا، پێویستمان بە هەوڵی هاوبەش و بەکارهێنانی هەماهەنگی هەموو ئەو سەرچاوانەی لە بەردەستدایە، بۆ بەرەنگاربوونەوەی ئەم قەیرانی ئاوارەبوونە بە هەموو ڕووەکانیەوە."

دوای نۆ ساڵ لە دەستپێکردنی ئاڵۆزییەکان لە سوریا، پەنابەرانی سوریا بەردەوامن لە رووبەڕووبوونەوەی ئاستەنگە دژوارەكان لە عێراق و ناوچەكانی تر. لەگەڵ ئەو بارودۆخە ناهەموار و نادیارەی ئێستادا ، کۆمەڵگەی ئاوارەکان لە هەموو کات زیاتر پێویستییان بە پاڵپشتییە. ئەڵمانیا لە ڕێگەی ئەم پارەدانەوە، جارێکی دیکە ئەوە پیشان دەدات کە پابەندە بە یارمەتیدانی ئەو کەسانەی کە نیازمەندن، هەروەها سەرچاوەی پێویست بۆ كۆمسیۆنی باڵای نەتەوە یەكگرتووەكان بۆكاروباری پەنابەران (UNHCR) دابین دەکات، تاوەكو بەردەوام بن لە گەیاندنی ئەم یارمەتییانە.

نوێنەری بریكاری كۆمسیۆنی باڵای نەتەوە یەكگرتووەكان بۆ كاروباری پەنابەران (UNHCR) ، خاتوو فلیپا كاندلەر، وتی:"لەگەڵ تێپەڕینی هەر ڕۆژێک، دۆخی ژیانی خێزانە ئاوارەکان لە عێراقدا زیاتر دژوار دەبێت، ئەم هاریكارییە بەردەوام و دڵفراوانانە و نەرمونانەیە، بەڕاستی هێڵی ژیانە، کە ڕێگە بە پەنابەران دەدات پاڵپشتیی خێزانەکانیان بکەن و، بە شکۆوە پێداویستیەکانیان دابین بكەن." هەروەها ڕایگەیاند:"بەردەوامیی پشتگیری لە لایەن بەخشەرانی وەک کۆماری ئەڵمانیای فیدراڵ، بۆ خێزانە پەنابەرەکان لە عێراق زۆر بە گرنگی دەمێنێتەوە."


بۆ زانیاریی زیاتر پەیوەندی بكەن بە
فیراس ئەلخەتیب، وتەبێژ و بەرپرسی پەیوەندییەكان
بەغداد، عێراق
009613009940
ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی.

شەزا شكفە، یاریدەدەری بەرپرسی پەیوەندییەكان
هەولێر، عێراق
009647704946384
ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی.

ڕەشید حسێن ڕەشید، بەرپرسی باڵای پەیوەندییەكان
دهۆك، عێراق
009647507130014
ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی.

© 2021 United Nations Iraq. هەموو مافەکانى پارێزراوە.